Eit av dei faste høgdepunkta våre gjennom året er Brusteinsballet på Universitetsplassen 17. mai.

Ballet er vårt tilskot til 17. mai-feiringa i hovudstaden. Her kan alle vere med, og det kostar ikkje eitt øre. Vår trufaste samarbeidspartnar gjennom mange år er Østerdølenes spelemannslag. Ballet opnar presis kl. 18.14 med ein minikonsert ved Songlaget i BUL, og så går vi raskt over i ein festmarsj (polonaise) der alle som har lyst, vert dregne inn. Med rettleiing frå Aulatrappa får folket prøve seg på både runddansar og turdansar.

Kl. 19.05 tek vi ein pause med ein megakviss (Dovreduellen) der det heile tida er 50 % sjanse for å gå vidare - eller å verta slått ut. Det vankar gilde premiar på flokken som står att på valen.

Dansen held fram til kl. 20.08 (neste år til 20.09 osb.).

Om det regner, dreg vi med oss heile folkemengda ned i Teatersalen vår i Rosenkrantz gt.8.